Звучи како некоја приказна од анимиран филм, но не е шега – нова истражувачка иницијатива сака да им овозможи на луѓето да комуницираат со своите миленици користејќи вештачка интелигенција. Иако идејата за разговор со мачка или куче звучи интересно, експертите веќе предупредуваат за сериозните ризици што таквата технологија би можела да ги донесе ако се користи неодговорно.
Проектот го започнува Центарот за животинска свест „Џереми Колер“ при Лондонската школа за економија, а работата ќе започне кон крајот на септември. Со буџет од над 4 милиони фунти, центарот ќе ги истражува свеста и комуникацијата на животните преку интердисциплинарен пристап што вклучува невронаука, компјутерски науки, филозофија, ветеринарна медицина, вештачка интелигенција и право.
Главната идеја на проектот е користење на вештачката интелигенција за „преведување“ на сигналите што ги испраќаат животните – без разлика дали се работи за звуци, гестови или однесување. Целта е да се развијат алатки што би им овозможиле на луѓето подобро да ги разберат потребите и емоциите на своите миленици.
Но, тука се појавуваат првите проблеми. Директорот на центарот, професор Џонатан Берч, истакнува дека вештачката интелигенција има тенденција да генерира одговори што корисниците сакаат да ги слушнат, а не нужно оние што се фактички точни. Кај домашните миленици, ова може да биде исклучително опасно – замислете апликација што ви кажува дека кучето е среќно и мирно додека не сте дома, кога всушност може да лае со часови. Таквото погрешно толкување може сериозно да ѝ наштети на благосостојбата на животното.
Затоа, Берч повикува на итно усвојување етички и регулаторни рамки за употреба на вештачка интелигенција во контекст на животните бидејќи во моментов речиси и да нема правен надзор во оваа област.
Центарот планира и истражувања во други, честопати занемарени области. На пример, етиката на автомобилите што се управуваат самостојно кога станува збор за судири со луѓе е предмет на дебата со години, но малку се зборува за тоа што се случува кога автомобил ќе удри куче или друго животно. Примерот од 2023 година кога возило на „Вајмо“ уби куче покажува дека е време сериозно да се разгледаат овие прашања.
Вештачката интелигенција сè повеќе влегува и во земјоделството – „Хуавеј“ веќе ја користеше вештачката интелигенција за следење на свињарството во Кина. Ваквите системи често се претставуваат како „паметни“, но ретко се доведуваат во прашање последиците за самите животни.
Центарот сака да постави основа за глобални упатства, истражувања и практики што би можеле да ја заштитат благосостојбата на животните во ерата кога технологијата сè повеќе ги опкружува – честопати без нивно знаење и, се разбира, согласност.
Ова не е прв обид за спојување на вештачката интелигенција и животните. „Гугл“ неодамна го претстави „Долфин гема“, кој користи телефони и вештачка интелигенција за толкување на звуците на делфините, со надеж дека еден ден ќе можеме да „разговараме“ со овие морски цицачи.
Дури и ако не водиме секојдневни разговори со нашите кучиња, ова истражување покренува интересни прашања – не само за животните, туку и за човечката свест, емпатијата и улогата на технологијата во светот што го споделуваме со сите други видови.
Извор: bajtbox.com
Фото: Freepik
